2025 අගෝස්තු 17. 

මනෝරාණි සරවනමුත්තු නැත්නම් රිචර්ඩ් ඩි සොයිසාගේ මව 1991 දී තවත් මවුවරුන් කිහිපදෙනෙකු සමග එක්ව, 1971 සිට 1990 කාලය තුළදී සිදුවූ තරුණ කැරලි හේතුවෙන් අනිතිකව අත්අඩංගුවට ගත්  සහ අතුරුදහන් වූ තරුණයින් ට සාධාරණයක් ඉටු කරගැනීමේ අරමුණින් “මව්වරුන්ගේ පෙරමුණ” ආරම්භ කරන ලදී. භීෂණ කාලය තුළදී තමන්ගේ දරුවන් අහිමිවූ මව්වරුන් සහ වෙනත් සිවිල් සමාජ කණ්ඩායම් එක්ව මව්වරුන්ගේ පෙරමුණ ආරම්භ කිරීම මගින් අපේක්ෂා කරන ලද්දේ සමාජ සාධාරණත්වය සහ යුක්තිය වෙනුවෙන් ජනතාව පෙළගැස්විමයි.

එවකට පැවති එක්සත් ජාතික පක්ෂ රජය 1993 දී බස්නාහිර පළාත් සභා ඡන්දය පරාජය වීම කෙරෙහිත්, 1994 දී මහමැතිවරණය සහ ජනාධිපතිවරණය පරාජය වීමටත් මෙම මව්වරුන්ගේ පෙරමුණ ඇති කරන ලද මතවාදය බලපෑ බවට විශ්වාස කරයි.

2023 වර්ෂයේදී  ශ්‍රී ලංකාවේ  ජීවත්වෙන LGBTIQ+ ප්‍රජාවට එරෙහි ව්‍යාපාරයක් ලෙස ව්‍යාජ මව්ව්වරුන්ගේ පෙරමුණක් ආරම්භ වන්නේ ඉවැන්ජලිකල් පල්ලිය ප්‍රවර්ධනය කිරීම, රාජපක්ෂ රෙජීමය විසින් වපුරනු ලබන ජාතිවාදී සහ ලිංගවාදී කල්ලිවාදය  ප්‍රවර්ධනය කිරීම සහ ජනතාව තුළ LGBTIQ+ ප්‍රජාව පිළිබඳව වෛරයක් ඇතිකිරීම අරමුණු කරගනිමිනි. 1991 දී  ආරම්භ වූ සැබෑ මව්වරුන්ගේ පෙරමුණේ නම බලහත්කාරයෙන් සහ ව්‍යාජව භාවිත කරමින් වර්තමාන මව්වරුන්ගේ පෙරමුණ ජෙහාන් හමීඩ් සහ ෂෙනාලි  වඩුගේ ප්‍රමුඛ කරගත් තවත් දේශපාලන කල්ලියක් විසින් වෛරය පැතිරවීම සඳහා මෙහෙයුම් ක්‍රියාත්මක කරමින් සිටි.

සමරිසි පුද්ගලයින් අතර සිදුවනු ලබන ආදරණිය හෝ ලිංගිකමය ක්‍රියාකාරකම් අපරාධයක් ලෙස සැලකීමට පොලිසිය විසින් භාවිත කරනු ලබන දණ්ඩ නීති සංග්‍රහයේ 365 සහ 365 අ වගන්ති ඉවත් කිරීමට සහ සංශෝධනය කිරීම සඳහා 2023 වර්ෂයේදී ප්‍රේම්නාත් ශ්‍රී දොලවත්ත නම් මන්ත්‍රීවරයා විසින් පෞද්ගලික මන්ත්‍රී කෙටුම්පතක් පාර්ලිමේන්තුවට ඉදිරිපත් කළ  අතර, එම  කෙටුම්පත ශ්‍රී ලංකාවේ ආණ්ඩුක්‍රම ව්‍යවස්ථාවට පටහැනි බව දක්වමින් ශ්‍රේෂ්ඨාධිකරණයට පෙත්සමක් ගොනු කරනු ලැබුයේ මෙම ඊනියා මව්වරුන්ගේ පෙරමුණේ කැඳවුම්කරුවන් ලෙස සැලකෙන ෂෙනාලි වඩුගේ සහ ජෙහාන් හමීඩ් විසිනි.  එහෙත් ඔවුන්ගේ උත්සාහය ශ්‍රී ලංකාවේ ජීවත්වෙන LGBTIQ+ ප්‍රජාව සහ මානව හිමිකම් ක්‍රියාකාරීන් විසින් පරාජය කරනු ලැබුයේ එම පෙත්සමට එරෙහිව අතුරු පෙත්සම් 12ක් ශ්‍රේෂ්ඨාධිකරණයට ඉදිරිපත්  කිරීමෙනි.

හිටපු අගවිනිසුරු ජයන්ත ජයසුරිය ප්‍රමුඛ ත්‍රිපුද්ගල විනිසුරු මණ්ඩලයක් හමුවේ දින දෙකක වාචික ඉදිරිපත් කිරීම් සහ, පිටු පන්දාහක් පමණ වන ලිඛිත ඉදිරිපත් කිරීම් අවසානයේදී ශ්‍රී ලංකාවේ LBGTIQ+ ප්‍රජාව දිනාගත් විශාලතම ජයග්‍රහණය වුයේ ඉහත පෞද්ගලික මන්ත්‍රී කෙටුම්පත ව්‍යවස්ථාවට පටහැනි නොවන බවට  ශ්‍රේෂ්ඨාධිකරණය තීන්දු කිරීම මගිනි. මව්වරුන්ගේ පෙරමුණේ එම ව්‍යාජ සහ අපහාසාත්මක කරුණු දැක්වීම් ශ්‍රේෂ්ඨාධිකරණය විසින් ප්‍රතික්ෂේප කරනු ලැබුවේ, ඒවා පදනම් විරහිත සහ හිතළු මත පදනම්වූ ඒවා ලෙස සලකමිනි. එහෙත්, මෙම ව්‍යාජ මව්වරුන්ගේ පෙරමුණ ශ්‍රේෂ්ඨාධිකරණය විසින් ප්‍රතික්ෂේප කරන ලද චෝදනා සියල්ලම නැවත නැවතත් සමාජගත කරමින් සිටින්නේ ශ්‍රේෂ්ඨාධිකරණයටද අපහාස කරමිනි.

මෙම ව්‍යාජ මව්වරුන්ගේ පෙරමුණ පෙනී සිටින්නේ ඔවුන් ශ්‍රී ලංකාවේ දරුවන්ගේ අනාගතය ආරක්ෂා කිරීම සඳහා මුලිකත්වය ගනු ලබන බව සඳහන් කරමිනි. ඔවුන් ප්‍රකාශ කරන ආකාරයට  ශ්‍රී ලංකාවේ දරුවන් LGBTIQ+ බවට පත් කිරීමට විශාල මෙහෙයුමක් පවතින අතර, එම මෙහෙයුම ජාත්‍යන්තර ඖෂධ මාෆියාව සමග සම්බන්ධ වී තිබේ. එමෙන්ම, පිරිමි දරුවන් ගැහැණු දරුවන් කිරීමට සහ ගැහැණු දරුවන් පිරිමි දරුවන් කිරීමට හැකි විස්මිත බලයක් මෙම LGBTIQ+ ක්‍රියාකාරීන්ට පවතින නිසා දැයේ දරුවන්වන්ගේ එකම මුරදේවතාවුන් ලෙස මෙම ව්‍යාජ මව්වරුන්ගේ පෙරමුණ පෙනී සිටි.

ඔවුන් LGBTIQ+ ප්‍රජාවට අපහාස කරමින් කියා සිටින්නේ මොනවාදැයි බලමු.  LGBTIQ+ ප්‍රජාව මානසික විකෘතියක් ලෙස ඔවුන් දකී.

1973 දී ඇමෙරිකානු මනෝවිද්‍යා සංගමය, 1992 දී ලෝක සෞඛ්‍ය සංවිධානය විසින් LGBTIQ+ වීම මානසික රෝගයක් නොවන බවට ප්‍රකාශ කර තිබියදීත්, 2021 දී ශ්‍රී ලංකා මනෝවෛද්‍යවරුන්ගේ විද්‍යාලය විසින් LGBTIQ+ ප්‍රජාව අතිශයින්ම සාමාන්‍ය ප්‍රජාවක් බව දක්වා පමණක් නොව, ඔවුන්ව අත් අඩංගුවට ගැනීමට භාවිතා කරන නීති සංශෝධනය කිරීමට අවශ්‍ය පියවර ගන්නා ලෙසද යෝජනා කර ඇත. එහෙත්, නුතන විද්‍යාව හෝ නුතන දැනුම විද්‍යාත්මක සාක්ෂි මත පදනම්ව කුමක් කිව්වද, මව්වරුන්ගේ පෙරමුණේ ව්‍යාජ අම්මාවරුන්ට ඒවා ප්‍රමාණවත් නැත.

එම නිසා ඔවුන් කොටුව දුම්රිය ස්ථානය ඉදිරිපිටට පැමිණ LGBTIQ+ ප්‍රජාවට එරෙහිව මිත්‍යාව පතුරුවන අත් පත්‍රිකා බෙදනු ලැබිය. මිනිසුන් ඔවුන්ව සත පහකට ගණන් ගත්තේ නැත. ඉන්පසුව ඇමෙරිකානු තානාපති කාර්යාලය ඉදිරියේ නුවරඑළියෙන් රුපියල් 5000කට කුලියට ගෙන්වනු ලැබූ කම්කරු කාන්තාවන් කිහිප දෙනෙකු සමග එක්ව, විරෝධතාවයක් සිදුකරනු ලැබූ අතර, ඇමෙරිකානු ජනාධිපති ඩොනල්ඩ් ට්‍රම්ප්ගේ සමරිසි විරෝධී ප්‍රතිපත්තිය අගය කරන බව දැන්විය. හාස්‍යයට කරුණ නම් ජෙහාන් හමීඩ්, ෂෙනාලි වඩුගේ වැනි අය  2018 වර්ෂයේ පොහොට්ටුවට කඩේ යන කාලයේදී දැඩි ඇමෙරිකන් විරෝධී අය ලෙස පෙනී සිටීමයි.

දැන් ඔවුන් පාසල් ගුරුවරුන්, විදුහල්පතිවරුන් සහ දෙමව්පියන් ඇතුළත් වට්සැප් ගෘප් සමුහයක් පාලනය කරමින්, පාසල් ගේට්ටු අසල සිටින දෙමව්පියන්ට හා ශිෂ්‍යයින්ට LGBTIQ+ විරෝධී අත් පත්‍රිකා බෙදාහරිමින් සමාජයට වෛරය සහ සමරිසි භීතිකාවක් පොම්ප කරමින් සිටි. මව්වරුන්ගේ පෙරමුණ ගැන අපි තැකිය යුත්තේ ඇයි? ඔවුන් හුදු සමරිසි ප්‍රජාවට එරෙහි කණ්ඩායමක් නිසා පමණක්මද ?

මව්වරුන්ගේ පෙරමුණ ට මෙම වැඩමුළු සඳහා, විරෝධතා සඳහා ඩොලර් දහස් ගණන්වලින් වියදම් කරන්නේ ඉවන්ජලික ක්‍රිස්තියානි ජාලය මගිනි. ඇමෙරිකා එක්සත් ජනපදයේ, ටෙක්සාස්හි  ඇති අගපේ මිනිස්ට්‍ර් (Agape Ministry) ඇතුළු මුලධර්මවාදී කණ්ඩායම් මගිනි. ඊට අමතරව, උතුරු ඇමෙරිකාවේ සහ යුරෝපයේ ව්‍යාප්තව සිටින ජාතිවාදී සහ ලිංගවාදී ඩයස්පෝරා කණ්ඩායම් ද, ඔවුන් වෙනුවෙන් මුදල් පොම්ප කරමින් සිටි. බැලූ  බැල්මට මව්වරුන්ගේ ව්‍යාපාරය සහ, පසුකාලීනව ඔවුන් සමග එක්වූ, හිටපු අමාත්‍ය, දැනට රක්ෂිත බන්ධනාගාර ගතව සිටින කුප්‍රකට මර්වින් සිල්වාගේ පියවරුන්ගේ පෙරමුණ LGBTIQ+ ප්‍රජා විරෝධී ව්‍යපාරයක් ලෙස පෙනී සිටියද, ඔවුන්ගේ සැබෑ අරමුණ LGBTIQ+ ප්‍රජාවට එරෙහි මතවාදයක් සැදීම නොවේ. ඒ ඉවන්ජලිකල් ක්‍රිස්තියානි දහම ශ්‍රී ලංකාවේ ප්‍රචාරය කිරීමට අවශ්‍ය මහජන සහාය ගොඩනැගීමටයි. එමෙන්ම, නැවත වතාවක්, ජාතිවාදය සහ ලිංගවාදය සමාජගත කරමින් 2022 ට පෙර සමාජයේ පැවති තත්ත්වයට රට ගෙනයාමයි.

ජනතාව ලෙස අප තේරුම් ගත යුතු වඩාත්ම වැදගත් දෙය නම්, මෙම ව්‍යාජ මව්වරුන්ගේ පෙරමුණ, ස්වභාවිකව නිර්මාණයක් වුවක් හෝ, මහජනතාව අතරින් පැන නැගුන හෝ එකක් නොවී, එක්තරා දේශපාලන කණ්ඩායමක වුවමනාවකට, උත්තරීතර මාතෘත්වය භාවිතා කිරීමයි. ගෝලීය වශයෙන් ක්‍රියාත්මක වන මුලධර්මවාදී කණ්ඩායමක් හා සම්බන්ධ වෙමින් දරුවන්ගේ සහ දෙමව්පියන්ගේ හැඟීම් සහ ආකල්ප වලට වැරදි ලෙස බලපෑම්  කිරීමයි.

සමරිසි හෝ සංක්‍රාන්ති වීමට කිසිදු පුද්ගලයෙකුට බල කළ නොහැක. කොන්කොට සැලකීමට හෝ වෙනස් කොට සැලකීමට ලක් වෙනවා යයි දැන දැනම කිසිදු පුද්ගලයෙකු සමරිසි වන්නේ ද නැත. සමරිසි වීම හෝ සංක්‍රාන්ති වීම එම පුද්ගලයින්ගේ අතිශයින්ම පෞද්ගලික තීරණයකි. අත්දැකීමකි. ඔවුන්ගේ හැඟීම් සහ ජීවිතය සම්බන්ධ තීරණයකි. එම තීරණවලට මැදිහත් වෙන්න එපා යැයි ශ්‍රේෂ්ඨාධිකරණය පවා තීරණය කර තිබියදීත්, සමරිසි ප්‍රජාවට එරෙහිව දැනටමත් සිදුවෙන ප්‍රචණ්ඩත්වය ඔවුන්ට දරා ගැනිමට අපහසු ස්ථානයක පවතිද්දීත් දේශපාලනික අවශ්‍යතා නිසා  හෝ, ආගමක් ප්‍රචාර කිරීමේ අරමුණින් හෝ සිදුකරනු ලබන මෙවැනි ක්‍රියාකාරකම් ඉතා පිළිකුලෙන් යුතුව හෙළා දකින්න.

තුෂාර මනොජ්

සභාපති

ඉක්විටි ආයතනය